Perquai che l'Implenia aveva denunzià sa sezza sco emprima firma involvida en il cartel da construcziun tar las vias en il chantun Grischun, n'aveva l'interpresa betg survegnì sancziuns da la WEKO. La firma sto dentant pajar sezza ina part dals custs per la procedura – radund 77'000 francs. Quai mussa la sentenzia dal Tribunal administrativ federal. Plinavant ha la dretgira decidì che las mesiras da la WEKO envers la Implenia sajan legitimas.
Uschia na po l'Implenia betg prender si contact cun autras interpresas da construcziun sch'i va per projects da construcziun da vias ch'èn scrits ora e na po betg s'infumar davart pretschs u offertas. Er tar lavurs da construcziun auta è il barat d'infurmaziun vegnì restrenschì.
«Difficultads cun dretg da cartel»
La raschun per questas mesiras che valan sur l'entira Svizra, è ch'i dettia il privel che l'interpresa repetia ils sbagls e sa cunvegnia er en avegnir cun autras interpresas. L'ultim temp haja l'Implenia pliras giadas gì difficultads da sa tegnair vi dal dretg da cartel, scriva il tribunal. Er en ils chantuns Argovia, Son Gagl ed il Tessin haja dà ulteriurs cas.
Perquai dettia cleramain indizis che l'interpresa vegnia er en avegnir a surpassar la lescha da cartel, malgrà las stentas en il sectur da compliance.
Confermà duas ulteriuras sancziuns
Er envers la firma cumpigliada Centrorame ha il Tribunal administrativ federal confermà ina sancziun da 483'000 francs. Las trais firmas Schlub, Schlub Nordbünden e Schlub Südbünden ston pajar 755'000 francs.