Il Centro Sanitario Bregaglia (CSB) na correspunda betg pli als basegns d'ina tgira actuala e dovra urgentamain diversas investiziuns. Previs è da sanar l'edifizi istoric «Ganzoni» e da fabritgar daspera in edifizi nov. Tenor il president da la cumissiun administrativa dal CSB, Maurizio Michael, dovr'ins dapli spazi ed in'infrastructura moderna.
Oriundamain vulevan nus mo sanar e restructurar l'edifizi istoric. Per quai avessan nus dentant stuì fabritgar divers provisoris e quai fiss vegnì bler pli char.
En il nov edifizi duai vegnir alloschà la pratica da medi, la fisioterapia e la nova cuschina. L'edifizi «Ganzoni» duai vegnir sanà levamain. Là duain en avegnir esser en la pratica da dentist, las abitaziuns existentas, stanzas per il persunal e l'administraziun.
En pli duai la tecnica dal CSB vegnir sanada, i dovra in nov stgaudament, ina nova lavandaria ed in nov indriz da current d'urgenza. Questas investiziuns duai la vischnanca Bregaglia sco possessura dal Centro Sanitario Bregaglia surpigliar. La populaziun vegn infurmada ils 24 da favrer, ils 24 da mars duai ella lura decider en chaussa.
Il CSB è impurtant per nossa val, quai avain nus badà en spezial durant la pandemia. Impurtant per restar ina regiun da sanadad autonoma.
Dapi l'onn 2016 è l'ospital en Bregaglia organisà sco corporaziun da dretg public, sco center da sanadad, che unescha diversas spiertas sut in tetg. Gia lura aveva cumenzà la tschertga da novs medis, cunquai ch'il schefmedi steva lura curt avant la pensiun. Entant èsi gartegià dad engaschar ina nova media.
La nova media dat ina nova perspectiva al CSB. Nus avain damai superà in mument difficil.
Perquai saja uss il bun mument per in tal project da sanaziun e schlargiament.
Avant dus u trais onns n'avessan nus pli probabel betg gì il sustegn. Perquai che fabritgar in chastè senza retg fiss stà grev da declerar al suveran.
Il CSB prevesa dad investir totalmain 14 milliuns francs. 4,5 milliuns duai la vischnanca surpigliar, il rest finanziescha il centro sez. Sche tut va bain pudessan las lavurs da contrucziun cumenzar l'atun 2023.