Siglir tar il cuntegn

Header

cuntegn

Certificat en traffic public La regenza grischuna relativescha sia pretensiun

La regenza grischuna veglia extender il certificat da Covid sin il traffic public. Quai èsi stà da leger en las lingias grassas dals meds da massa. Ussa dentant relativescha il cusseglier guvernativ da sanadad Peter Peyer quella pretensiun.

video
Obligatori da certificat en il traffic public
Or da Telesguard dals 31.08.2021.
laschar ir. Durada: 2 minutas 35 Secundas.

En la resposta a la Confederaziun hajan els be mess en parantesas  à () quella mesira e plinavant betg directamain pretendì mabain plitost dumandà d’examinar era talas pussaivladads, uschia il cusseglier guvernativ per sanadad Peter Peyer. Las cifras actualas sajan alarmantas. Perquai saja da chattar novas ideas per franar il virus. Ins veglia per tut pretsch evitar che la stagiun d’enviern giaja da la glatscha giu. Perquai èsi da far ponderaziuns en tuttas direcziuns – era en il traffic public.

Sper ils bigliets pudess il conductur forsa era controllar il certificat. Igl è pussaivel da crear sper 1./2. classa anc ina per persunas ch’han in certificat.
Autur: Peter Peyer cusseglier guvernativ
audio
Certificat da corona per il traffic public – va quai insumma?
ord Actualitad dals 31.08.2021.
laschar ir. Durada: 3 minutas 5 Secundas.

Ma co realisar?

Per il manader da fatschenta dal bus da Cuira Ralf Kollegger datti anc bleras dumondas avertas. El di sch’i dess in certificat obligatoric en il traffic public lura fissi schon ina gronda sfida d’implementar quai. Ils problems cumenzassan gia cun co infurmar la clientella che quai obligatori vala. Vinavant fissan els era cun las resursas da persunal sut squitsch. Els s’expriman perquai da cuntinuar cun la mesira che vala gia – il obligatori da mascra. Sin dumonda sajan era las pendicularas grischunas che fan medemamain part dal traffic public s’exprimì cunter in tal certificat. La viafier retica percunter n’ha il mument betg vulì prender posiziun.

RTR actualitad 17:00

Artitgels legids il pli savens