En il Grischun sa partizipeschan radund 2’200 fatschentas als tests da massa da Covid. Las 30'000 collavuraturas e collavuraturs che fan part han a partir dad immediat la pusseivladad da survegnir sin questa moda in certificat che vala trais dis – e quai gratuitamain. Tgi che less dentant in certificat cun ils tests da spida sto far quel sut surveglianza. Co che quai vegn organisà è chaussa da las fatschentas e sa basa er sin fidanza, ha declerà Martin Bühler, manader dal stab directiv chantunal.
Ils tests sa basan sin fidanza e n'èn betg per 100% segirs. Las fatschentas ston dentant confermar che tut è ì tiers correctamain.
Il chantun fida pia a las fatschentas. Sch'i dess maldiever da la purschida fiss quai falsificaziun da documents. Plinavant vegniss la firma sclausa da la pussaivladad da far tests per certificats, quai che tutgass il persunal. Martin Bühler è da l'avis ch'i dettia cunzunt blers tests cunter la fin da l'emna, per avair in certificat la fin d'emna. Tge che quai chatsch munta per ils labors che examineschan las provas na sappian ins anc uss betg dir. Enfin la fin da november porscha il chantun Grischun la pussaivladad da tschentar or certificats sin basa dals tests da fatschenta.
