La situaziun umanitara en la Strivla da Gaza sa pegiurescha di per di. I na dat betg avunda aua, vivonda e medicaments. Per sustegnair la populaziun civila pertutgada, appellescha la Chadaina da Fortuna puspè a la solidaritad.
- online sut: www.chadainadafortuna.ch
- per e-banking sin il conto postal: CH82 0900 0000 1001 5000 6 (u cun scannar il QR-code agiuntà)
Dapi l'october da l'onn passà ha la Chadaina da Fortuna gia pudì ramassar 2,5 milliuns francs, grazia a l'agid da la populaziun svizra. Las donaziuns han pussibilità da porscher agid essenzial tras las organisaziuns partenarias (HEKS, Fondation Terre des Hommes e Frieda).
Quests projects cuntegnan la distribuziun da vivonda, pachets d'igiena, vestgadira chauda ed agid finanzial punctual per che famiglias possian dustar lur pli impurtants basegns. Plinavant dattan els sustegn psicosocial ad umans ch'èn traumatisads tras la guerra.
Las organisaziuns partenarias da la Chadaina da Fortuna èn cunzunt lavurusas en il sid da la Strivla da Gaza. Là èn las pli bleras persunas fugidas e vivan en alloschis provisorics. In pèr d'ellas resta dentant er en il nord per sustegnair las persunas ch'èn restadas en il nord.
Situaziun umanitara è catastrofala
Las dimensiuns da la pitgira èn dramaticas, e la Chadaina da fortuna è visada sin mintga ulteriura donaziun per vinavant sustegnair las persunas pertutgadas da la guerra. En il mument datti ils pli gronds basegns en la Strivla da Gaza. Ina escalaziun dal conflict en la regiun n'è dentant betg d'excluder. La Chadaina da Fortuna è era pronta per gidar en auters pajais, sche necessari.
Ils umans en la Strivla da Gaza fan tras en il mument la mendra crisa umanitara en l'istorgia recenta. Il dumber da victimas – cunzunt dunnas ed uffants – munta a diesch-millis ed ils umans vivan en permanent stress e senza lieus da refugi.
«Malgrà la situaziun umanitara ordvart precara èsi gartegià a nossas organisaziuns partenarias da mantegnair agid umanitar existenzial. Nus appellain a la populaziun svizra, per che nus possian cuntinuar cun noss agid ed engrondir quel en cas d'in armistizi», di Miren Bengoa, la directura da la Chadaina da Fortuna.
