Il concert da la societad da musica, il teater da l'uniun da giuventetgna, prelecziuns litteraras, la saira da lotto organisada da l'uniun da tir u la bursa da vestgadira d'uffants. Ils termins per tals eveniments ed anc blers auters èn da chattar a partir d'immediat sin la nova plattafurma digitala chalender.ch. Sin questa pagina d'internet duess vegnir ensemen en futur l'entira schelta d'occurrenzas rumantschas. Eveniments da tut gener, per pitschen e grond, che han lieu en tut las regiuns dal Grischun, sco er en la diaspora rumantscha.
Roman Pfister, il president da l'Uniun da las Rumantschas e dals Rumantschs en la Bassa (URB), declera che la finamira saja d'avair ina survista da tut las occurrenzas da lingua rumantscha. Ina e scadin, en spezial er uniuns, pon publitgar lur eveniments. E tar las publicaziuns sajan ins betg «strict total» ma las occurrenzas duessan schon avair ina colliaziun cun il rumantsch.
Plinavant vuless'ins er promover uschia la lavur culturala rumantscha, cun porscher ina plattafurma digitala che simplifitgescha da cuntanscher in public pli grond.
E pledentà vegnan betg mo quellas e quels ch'èn savens online. I dat numnadamain er la pussaivladad d'abunar in servetsch d'e-mail ch'infurmescha uschespert ch'i dat ina occurrenza che correspunda als criteris elegids. Per exempel occurrenzas ch'èn damanaivel u d'in interess specific.
Plinavant datti sper la funcziun dal chalender d'occurrenzas era ina tavla naira, nua ch'ins po infurmar Rumantschas e Rumantschs davart diversas chaussas. Là pon ins per exempel far in appel ch'ins tschertga gidantras e gidanters per occurrenzas, u ins po far in avis sin autras purschidas e projects che n'han nagin connex direct cun ina occurrenza classica. Las occurrenzas po mintgin e mintgina dar en sez en il chalender digital.
Damai ina plattafurma digitala survesaivla ed intuitiva, cun ina simpla navigaziun. Quai mussian er ils resuns ch'i haja dà en connex cun ils tests che sajan vegnids fatg ordavant, di Roman Pfister.
La glieud di «wow, quai è bun, quai è ina buna chaussa». Uschia vesain nus ch'il project po daventar in success. Ma el sto er vegnir duvrà.
Uschia che Roman Pfister spera ch'i vegnia fatg grond diever da la nova purschida, per ch'ella viva e s'etablescha.