Suenter che la stagiun d'enviern passada è stada la pli schleta en l'istorgia dal Club alpin svizzer CAS, èn las chamonas «mitschadas cun ina noda» la davosa stagiun da stad, sco il CAS ha communitgà l'entschatta da quest onn. Questa stad èn ils cudeschs da reservaziun da las chamonas bain emplenidas, ma i dat adina puspè annullaziuns pervi da la situaziun da l'aura instabila.
Dependa nua che la chamona è situada
I dependa nua che la chamona è situada e tge intent ch'ils giasts han, datti dapli u pli paucas annullaziuns pervi da l'aura. Sch'ina chamona è accessibla simpel e sche la chamona è la finamira dals giasts, lura vignan els malgrà la plievgia. Quels che han planisà dad ir en muntogna e viandar na vegnan plitost betg, sche l'aura na constat betg.
Ils turists dal di mancan
En la chamona Maighels e la chamona Kesch mancan surtut ils turists dal di, quels portan ina gronda part da la svieuta. Quels mancan pervi da l'aura u probabel era, perquai ch'ins po puspè far vacanzas en l'exteriur. Era sche 90% dals giasts èn Svizzers è il public sin las chamonas da CAS quest onn puspè pli internaziunal. Las fins d'emna èn per il solit pli fermas ch'ils dis da l'emna. Durant la stagiun auta na sent'ins dentant betg ina fitg gronda differenza.
Normalitad
Las mesiras da corona na fan betg pli gronda fadia a las chamonas da CAS, quellas sajan schon prest daventadas normalas. La gronda sfida resta la capacitad limitada che tut las 22 chamonas han anc adina. Ina stad bletscha cun nausch'aura poi adina dar, independent da la situaziun da pandemia. Ils guardiachamonas prendan sco ch'i vegn e fan il meglier ordlonder.