A partir dal 1. da schaner 2022 datti en il Grischun in post da consultaziun per unfrendas da discriminaziun rassistica. Uss vegn la purschida da cussegliaziun en quest sectur schlargiada, sco il chantun scriva.
Il post da cussegliaziun cumenza cun ina dimensiun da circa 10–20 pertschient d'ina plazza. La fin dal 2023 vegn lura fatg in’ emprima bilantscha.
Examinà pliras opziuns
L’onn passà era la pretensiun da stgaffir ina purschida per cussegliar en cas da discriminaziun rassistica vegnida adina pli ferma. Uschia ha il Departament da giustia, segirezza e sanadad (DGSS) examinà differentas opziuns. El è arrivà a la conclusiun ch'i duaja vegnir sa basà sin las cumpetenzas existentas dal Post spezialisà per l'integraziun.
Promover la chapientscha
La finamira è da porscher infurmaziun e cussegliaziun en dumondas da la protecziun cunter discriminaziun. L'interess per infurmaziuns davart il tema e per cussegliaziuns individualas è s'augmentà durant ils ultims onns. La gruppa en mira èn persunas u lur confamigliars che sa sentan discriminads pervia da lur colur da la pel, pervia da lur derivanza, pervia da lur religiun u pervia d'autras caracteristicas culturalas.
