La citad da Cuira daventa lieu d'etappa per la «ÖKK Bike Revolution» – in'occurrenza da mountainbike en trais etappas che cumenza il mars en la regiun dal Monte Tamaro (TI) e finescha il settember a Huttwil (BE). L'etappa da Cuira da l'event che vul unir il sport d'elita e da massa, sco er la promoziun da la generaziun giuvna, ha lieu ils 22 fin ls 24 d'avrigl.
Sco quai che la citad da Cuira communitgescha saja quai la chaschun ideala per Cuira e per l'entir chantun, da lantschar la stagiun da mountainbike. Quai era cunquai che stars sco il campiun mundial Nino Schurter e l'anteriur mountainbiker Ralph Näf fetschian part a la «ÖKK Bike Revolution» lantschada per l'emprima giada.
A mai giascha a cor da dar enavos insatge a mia patria ed al sport da mountainbike – era sper las cursas.
Ils trais dis da l'etappa a Cuira ha lieu era in eveniment grond en la citad. Quai cun occurrenzas per fans da bike, per famiglias ed exposiziuns.
Sustegn finanzial duai sa reducir cuntinuadamain
Per l'emprima ediziun da la Bike Revolution sustegna Cuira l'event cun 50'000 francs e relascha prestaziuns en la valita da 15'000 francs. Per las ediziuns futuras èsi previs da reducir la contribuziun communala cuntinuadamain, enfin ch'ella n'è betg pli necessaria il pli tard ils 2025.
La finamira è che mountainbikers e mountainbikras da l'entir mund sa mesiran en questa cursa l'entschatta da la stagiun. E quai cun ina summa da premi ch'è la pli auta da tals eveniments en Svizra: 140'000 francs per las trais cursas ed il classament general.