La regenza da la citad da Cuira sto anc ir ina giada sur ils cudeschs areguard il project Chasa d'Arcas. Il parlament da la citad da Cuira ha renvià in messadi per auzar il credit da 2,5 sin 3,2 milliuns francs per restaurar la Chasa d'Arcas en la citad veglia.
Suenter avair discutà quel ha il parlament da Cuira renvià el a la regenza per surlavurar, uschia che la Chasa d'Arcas pudess era vegnir duvrada per diever privat. Suenter la sanaziun da la Chasa d'Arcas vuleva la regenza da Cuira surdar quella ad ina «Societad purtadra center da cultura», che sto emprim dentant anc vegnir fundada.
Canortas pajablas
Plinavant ha il parlament declerà valaivel l’iniziativa da la PS che pretenda dapli canortas pajablas. L’iniziativa pretenda che la citad dublegia las contribuziuns da sustegn per la tgira d’uffants. Il parlament propona dentant da refusar l’iniziativa. Sustegn datti però per la cuntraproposta da la regenza. Quella pretenda in’augment da 50% – da var 1 milliun sin 1,5 milliuns francs.