Plirs acturs e pliras acturas ord la branscha da bajegiar e da la politica èn oz sa radunads sin il plazzal nua che la nova chasa da scola duai star en radund 2 onns. Las festivitads èn vegnidas arrundadas dad in intermezzo musical dals varga 100 uffants da la scoletta e scola primara.
In lieu per emprender e sfugar
Il bajetg vegl d’anno 1912 è vegnì stgarpà giu il mars. Actualmain van las scolaras ed ils scolars èn containers temporars sper il plazzal a scola e spetgan vess sin il nov bajetg. Planisà è ina chasa da 5 auzadas cun pliras stanzas da scolas sco era locals per zambregiar, lavurs a maun u maisa da mezdi. Tut en tut custa il bajetg radund 12 milliuns francs. Las lavurs cuzzan circa 2 onns e duajan esser finidas sin l’onn da scola 2023/24.
Retard entras in recurs
Atgnamain avess l’emprima badigliada giu d’avair lieu avant 5 mais. Ina firma da construcziun ch’è era sa participada tar la concurrenza da bajegiar la scola aveva dentant fatg recurs. Il motiv persuenter è stà ch’ins na haja betg resguardà lur offerta. La dretgira administrativa dal Grischun ha silsuenter tractà il cas giuridic. Ussa è quella sa decidida da refusar in recurs. Tenor Sandra Maissen, la manadra dal departament da bajegiar da Cuira dettia bleras perscripziuns sch’ins inoltrescha in’offerta – e quellas sajan da resguardar.
Qua ha insatgi gì il sentiment da betg esser vegnir tractà fair.
Il retard da 5 mais n'haja betg in effect sin la finiziun dal project. Sandra Maissen sa s’imaginar ch’ins vegnia durant l’enviern a stuair prolungar las lavurs, ma ella manegia ch’ils uffants possian far la midada en il nov bajetg sco planisà l’onn da scola 2023/24.