Siglir tar il cuntegn

Header

video
Chatscha da capricorns
Or da Telesguard dals 27.10.2021.
laschar ir. Durada: 5 minutas 25 Secundas.
cuntegn

Chatscha da capricorns Ina chatscha unica e tut speziala

Dapi 44 onns datti ella, la chatscha sin capricorns en Grischun. Per blers chatschaders, ma era per blers guardiaselvaschina la pli bella chatscha da l’onn. Ma ina ch'è era sa midada per part il davos temps.

6'500 capricorns ha l’uffizi da chatscha e pestga dumbrà questa primavaira en Grischun. Uschè blers sco anc mai dapi l’introducziun da la chatscha da capricorns l’onn 1977. La populaziun crescha anc adina perquai che la chatscha è ina chatscha da tgira e betg ina da regulaziun sco tar ils tschiervs. 

Malgrà ch’il capricorn era mort ora avant passa 100 onns e vala anc adina sco animal protegì federal dastga vegnir fatg chatscha sin els. L’uffizi da chatscha e pestga sto però dumandar mintg’onn la Confederaziun per lubientscha da dastgar schluppettar in tschert dumber d'animals. Igl è ina chatscha exclusiva. Tschintg onns sto in chatschader esser stà a chatsch'auta fin ch’el dastga s’annunziar per l’emprima giada per ir a capricorns. E suenter sto el spetgar mintga giada 10 onns fin ch’el po ir la proxima giada.

audio
Populaziun da capricorns è uschè gronda sco anc mai
ord Actualitad dals 27.10.2021.
laschar ir. Durada: 3 minutas 43 Secundas.

La chatscha è sa midada 

Dapi l’introducziun da la chatscha da capricorns avant 44 onns è quella sa midada. Quai davart dals capricorns ed era davart dals chatschaders. Ils animals èn vegnids pli precauts, han realisà il privel e sa retiran anc pli ferm en il territori muntagnard. Per ils chatschaders è la chatscha vegnida tras quai pli pretensiusa. Oravant tut quels che n'èn betg endisads da far chatscha en las muntognas vegnan per part a lur cunfins. Els survegnan gia agid dals guardiaselvaschina, ma in dretg sin in animal n'han els betg. Far chatscha sto la fin finala mintga chatschader sez.

Els tramettian ils chatschaders en lieus nua ch'i ha animals ch'en lubids per els e dettian tips co far chatscha en ils territoris ch’els n’enconuschan betg. Ma decider tge animal e la fin finala sajettar el ston ils chatschaders sez.

Malgrà las midadas, il model da chatscha da capricorns persvada anc adina. Uschè ferm, ch’el è era vegnì surpiglià dad auters chantuns svizzers. E schizunt pajais vischins laschan inspirar dal model Grischun per definir tar els co organisar la chatscha da capricorns.

RTR Telesguard 17:40

Artitgels legids il pli savens