App da chatscha – finanziaziun intscherta

Circa dus terzs dals chatschaders e las chatschadras en il Grischun han telechargià l'app da chatscha «Jagd GR». Malgrà quai èsi grev da finanziar il mantegniment da l'app.

Ina maun tegna in telefonin cun si la app da chatscha JagdGR Bild in Lightbox öffnen.

Legenda da maletgs: A la tschertga da daners per l'app da chatscha «JagdGR». RTR, Sandra Carisch

Radund 3'300 chatschaders e chatschadras han telechargià quest'app. Quai di Daniel Brändle che ha sviluppà ensemen cun in collega l'app che porscha tranter auter chartas, prescripziuns ed infurmaziuns davart ils contingents da sajettar. En il avegnir quintan ils sviluppaders cun memia paucas telechargiadas novas. La fiera saja gia saturada. Il problem saja che la app custia mo ina giada. Ina giada che la app saja telechargiada na stoppia il chatschader u la chatschadra betg pli pajar.

Sponsurs pajan ina part

Brändle e ses collega vegnan bain da cuvrir entras sponsurs las spesas da circa 1'000 francs ad onn per servers e domenas. Las bun 50 enfin 100 uras lavur ch'i dovra per actualisar la app na sajan dentant betg cuvertas. Uss speran ils sviluppaders che l'Uffizi da chatscha e pestga dal Grischun possia gidar cun la finanziaziun. In'autra pussaivladad fiss d'introducir in abunament per la app. Quai na correspundia dentant betg al princip da lur idea. I saja dentant da ponderar bain co finanziar en il avegnir quest service, di Brändle. Enfin la chatscha 2017 vegn la app en mintga cas ad exister vinavant.

RR actualitad 7:00