Chatscha 2016 – Georg Brosi fa ina bilantscha positiva

Malgrà che la chatscha da tschiervs n'ha betg cuntanschì ils 5'000 animals ch'ins haja vulì ed ils accidents capitads, è Brosi cuntent cun il resultat da la chatscha.

Laschar ir video «La chatsch'auta 2016 è a fin»

La chatsch'auta 2016 è a fin

2:02 min, Telesguard dals 3.10.2016

L’inspectur da chatscha chantunal, Georg Brosi fa ina bilantscha positiva da la chatscha 2016. Cifras exactas n’ha el anc betg, en spezial saja la chatscha da chavriels stada buna. La chatscha da tschiervs e quella da chamutschs saja en media sco ils onns passads.

La bun’aura e las temperaturas da stad n’èn betg gist stadas relaziuns idealas per la chatscha da tschiervs. Tuttina saja vegnì sajettà tenor Georg Brosi circa tuttina blers tschiervs sco l’onn passà. La finamira da sajettar pli u main 5'000 tocs na saja dentant betg cuntanschida. Uschia dettia probabel en las bleras regiuns dil Grischun ina chatscha supplementara.

Triep da lufs metta en moviment la selvaschina

Ils lufs el chantun Grischun mettan en moviment la selvaschina. Uschia ston ellas adina puspè sa mover e quai ha in effect positiv sin la chatscha. Uschia na san ils tschiervs ed ils chavriels numnadamain betg adina sa zuppar en ils guauds.

Plitost dapli accidents che ordinari

Georg Brosi trai ina bilantscha positiva, el deplorescha dentant era ils accidents che la chatscha ha chaschunà. Sper dus accidents cun trais persunas grev blessadas hai era dà dus accidents mortals. Quai sajan plitost dapli cas ch’ils onns passads, manegia Brosi.