Siglir tar il cuntegn

Chatscha 2018 5. di: La preda

I n'è betg da far prescha. Oz datti in di patgific. In gentar communabel dadora, i dat spaghettis e tuts èn da la partida, era la famiglia dal Pieder cun uffants e dunna. Igl è bell'aura, il sulegl splendura e nus giudain questa bell'aura. Enturn las 4 sa mettain nus sin via.

Jau stoss anc far fotografias da portrait dals chatschaders ed il Pieder po strusch spetgar da pudair partir: «Jau sent, cura ch'i vegn ina buna chatscha. E lura stoss jau ir e na poss betg spetgar», di el. Jau dun gas per che nus pudain partir tant pli svelt.

Nua ir questa giada?

Ensemen giain nus da la val ora sco adina ed avant ina senda sa ferma la gruppa. Els discutan, tgi che va sin tge post. Jau accumpogn Ursin, il pli giuven e nus giain sin in post fitg aut. Bun 10 meters sur terra sa chatta el, ma el porscha flot plaz per duas persunas si là. In amen sesain nus. Il temp passa, la natira sa mussa entant da sia pli bella vart. Igl è vegnì atun, ins vesa quai. Il rieven da tschella vart è sa midà en ina flanca tut cotschna. La glisch è miaivla ed il sulegl bass, pinads dad ir bainbaud da rendì.

aGuarda là!», di Ursin tut gnervus. El ha vis in chavriel. Bel èsi da guardar sco ch'il chavriel maglia en tut ruaus. El svanescha puspè. I fiss stà memia svelt per gia sajettar, manegia Ursin ed agiunta, ch'el n'era anc betg segir sche quest chavriel è propi lubì. Jau sun tut intgantada. Quest mument curt avant ch'ins (pudess) sajettar è in mument tut spezial. Il puls va ad aut ed il adrenalin sajetta tras las avainas. Ins vegn gnervus ed è focussà, ins è dal tuttafatg preschent quest mument.

Anc ina giada sa mussa il chavriel, Ursin sa entant ch'igl è ina chaura chavriel ma na po betg vesair, sch'ella ha in iver ubain betg. Sch'ella ha in, lura vul quai dir ch'ella ha pitschens e lura n'èsi betg lubì da sajettar. A mi sa dat la schanza da far in pèr bunas fotografias da l'animal. Ed ussa vesain nus era fitg bain, ch'ella tezza. Ella ha in iver. Curt suenter suondan ils pitschens.

Nus udin in sajet

E quel na po betg esser stà lunsch davent! Èsi stà insatgi da nossa gruppa? Gea! L'Andrea ha sajettà. Da noss post pudain nus vesair ella, però na savain nus anc betg tge ch'ella ha sajettà. Ursin survegn in SMS, igl è in taur da tschierv! Sajettà la saira ca. las 7. I cuzza anc in mument fin che nus udin il sbratg d'allegria.

Ursin ed jau sa mettain svelt sin via. Stefan Dobler e Curdin Fliri èn gia avant lieu per filmar. Il tschierv è suenter il sajet anc ids bun 100 meters a pe. Andrea e Gabriel han anc stuì tschertgar ina pezza. En ina spunda taissa han els lura chattà il taur. Cura ch'jau arriv al post han els gia prendì ora el ed èn pronts per al transportar aval.

I capita tut svelt e rutinà, era sche la via para tut auter che simpla. Stip e glischnus èsi sin quest pastg. I vegn saira, nus essan sa fermads giu avant via. Andrea emplaina ora ils formulars necessaris, silsuenter vegn ses bab siador cun la figlia d'Andrea. Nus faschain in viva ed Andrea organisescha il transport per il taur.

Il temp passa svelt, plansieu sa mussan gia las emprimas stailas durant che nus spetgain sin il transport ed Angela Hendry prepara tut per far in live-insert en il radio. Andrea po uschia gist rapportar live da sia fortuna dad oz. Per la squadra da RTR è quai stà il davos di d'accumpagnament e nus essan tuts cuntents ch'i ha gist dà preda oz, tge fortuna!

RR actualitad 06:00