Siglir tar il cuntegn

Chatscha 2018 Accident mortal a Litzirüti

Damanaivel da Litzirüti è in chatschader da 22 onns sa disgrazià sonda avantmzedi.

Vista sin il territori dad Arosa (maletg simbolic).
Legenda: Vista sin il territori dad Arosa (maletg simbolic). Keystone

Il giuven ha bandunà ensemen cun ses bab la tegia da chatscha. Cura ch'el n'è betg turnà da mezdi en tegia e n'è betg stà cuntanschibel cun il telefonin, han ins alarmà la Polizia chantunala.

Il bab è sez ì a la tschertga da ses figl en il territori grippus da Flüe en il «Prätschwald». In commember dal Club alpin svizzer ch'era per casualitad en la vischinanza cun ses chaun ha la finala chattà l'um al pe d'in grip. la squadra da salvament dal CAS Arosa ha cuntanschì il chatschader enturn las 14:30. La squadra ha dentant mo pli pudì constatar sia mort.

Pervi da la nausch'aura ha la Rega pir pudì salvar la bara dal chatschader giuven cunter saira. Tar l'acziun da retschertga èn stads en acziun dasper il CAS er in medi d'urgenza da l'Alpine Air Ambulance, ils pumpiers d'Arosa, in guardiaselvaschina e la Polizia chantunala.

RR novitads 14:00