Siglir tar il cuntegn
Inhalt

Chatscha 2018 Andrea Caviezel gudogna la patenta da chatscha 2019

La sort ha decidì: Ina chatschadra gudogna la concurrenza da chatscha da RTR, Andrea Caviezel da Vrin. Sulet duas dunnas han prendì part a la concurrenza da la preda. L'onn proxim po la Tudestga ir gratuitamain a chatscha cunquai ch'ella gudogna la patenta.

purtret da la chatschadra
Legenda: Andrea Caviezel cun sia chaura chamutsch ch'ella ha sajettà l'emprim di da chatscha. mad, Victor Caviezel

Da la muntanella fin il tschierv da curuna – er durant l'entira chatscha 2018 èn 21 predas vegnidas annunziadas a Radiotelevisiun Svizra Rumantscha RTR.

En il chapè dal guardiaselvaschina Armando Janett eran 21 nums, cun Andrea Caviezel (Vrin) e Sonja Decurtins (Sedrun) dentant sulet dus da chatschadras. E la «diala da fortuna» ha tratg gist in da quests dus nums da dunnas: Andrea Caviezel da Vrin. Dad ella era vegnida annunziada ina chaura chamutsch da 3 1/4 onns e pli veglia ch'ella ha sajettà l'emprim di da chatscha sin l'Alp Blengias.

In cordial engraziament va a tuttas ed a tuts ch'han annunzià per telefon la preda ed uschia fatg pussaivel la concurrenza per la patenta da chatscha.

Dapli da la chatscha 2018 chattais qua

Adrian Schorta ha gudagnà il radio DAB

Adrian Schorta cun la chaura da chamutsch.
Legenda: Il victur da la concurrenza da fotografias da chatscha 2018: Adrian Schorta cun la chaura da chamutsch schluppettada ils 22-09-2018 si sur Zernez. mad

La gallaria da fotografias da chatscha è vegnida emplenida quest onn cun 97 fotografias da predas per part cun il chatschader u la chatschadra e per part senza e cun intginas impressiuns da la chatscha.

Il victur dal radio DAB è Adrian Schorta. El gudogna il radio per la fotografia dad el e la chaura da chamutsch dad 11 onns ch'el ha schluppettà ils 22 da settember 2018 si sur Zernez.

Grazia fitg per la gronda participaziun a la concurrenza – nus sa legrain da puspè survegnir vossas fotografias da chatscha l'onn 2019!

RR accumpagnament 10:30