Siglir tar il cuntegn

Chatscha 2018 Bilantscha da l'emprima emna da chatscha

In buc-chavriel ed in taur-tschierv, quai è la bilantscha da la gruppa da chatscha Cungieri suenter l’emprima emna. Co èsi stà uschiglio dad ir a chatscha, e quant spezial èsi stà da laschar accumpagnar da quatter schurnalistAs da RTR?

Pieder Hendry stat a post, en tutta daratga.
Legenda: Pieder Hendry stat a post, en tutta daratga. RTR/ Seraina Derungs

La chatscha ha cumenzà pauc agreabel per la gruppa Cungieri. L’emprim eri plitost fraid e bletsch, e cunzunt ha la tschajera zuppentà la cuntrada ed ils animals. Dentant schon il segund di ha igl Ursin Decurtins gì cletg e sajettà in buc chavriel. Ulteriur cletg da chatscha ha lura l’Andrea Cavegn Beer gì il 5avel di, ella ha sajettà in taur-tschierv.

Il highlight è segir il taur che l’Andrea ha sajettà, in bel mument, nus avain stuì spetgar ditg sin success pli grond.
Autur: Pieder Hendrygruppa da chatscha Cungieri

E suenter n’hai dà nagut pli. La canera dal helicopter che sgola per las lavurs da colliaziun dals dus territoris da skis Sedrun e Mustér, ed il dir enviern han forsa tuttina gì pli gronda influenza che spetgà.

Sa legrà sin la famiglia e la duscha chauda

Per Pieder Hendry nagin problem, ch'el haja sajettà nagut. El spera sin la davosa emna da chatscha. Bun fiss in zic naiv. Ussa giauda el la famiglia e la duscha, e per duas emnas èsi da sa concentrar sin la lavur sco inschigner da construcziun.

Regurdientschas u disturbis

Cura che RTR ha dumandà la gruppa, dastgar accumpagnar ella durant l’entschatta da chatscha, èsi vegnì discutà davart il niz ed ils custs, las bellas regurdientschas ch’i dat a la fin, dentant era ils disturbis dals schurnalists. La fin finala ha l’entira gruppa detg gea.

Nus avain ditg tuts ston dir gea, uschiglio na faschain nus betg quai.
Autur: Pieder Hendrygruppa da chatscha Cungieri

Nus avain gì bleras bunas uras cun ils schurnalists e las schurnalistas, nus avain cuschinà ensemen ed avain emprendì d’enconuscher in a l’auter. Ed al post è mintgamai mo in vegnì, uschia ch’il disturbi è stà minim.

RR actualitad 08:00