Siglir tar il cuntegn
Inhalt

Chatscha 2018 Controllas pli rigurusas dals animals sajettads

La gronda novaziun da chatscha è segir e franc la controlla da charn. Quella controlla na dastga betg pli il mazler far, mabain il veterinari uffizial. Quai procura magari per dumondas.

Purtret da Giochen Bearth, substitut dal veterinari chantunal e responsabels per las controllas da charn en il Grischun.
Legenda: Giochen Bearth, substitut dal veterinari chantunal e responsabels per las controllas da charn en il Grischun. RTR/ Gion Gieri Flepp

Enfin ussa pudevan chatschaders e chatschadras ir cun la preda tar il mazler uffizial e lez decideva, tge charn ch’ins po duvrar e tgenina betg. Ussa sto il chatschader surprender dapli responsabladad. El sto observar l’animal avant sajettar, sa cuntegna el normal, suenter il sajet sto el controllar l’animal ed il sajet e lura decider, sche l’animal era saun u betg, lura metter ina marca vi da la chomma davostiers ed emplenir ora in formular.

Il veterinari uffizial n’ha nagins interess persunals ed è uschia independent.
Autur: Giochen Bearthsubstitut dal veterinari chantunal

Controllas da charn dovri, sche la selvaschina ha midaments ed ins less tuttina vender la charn u sche la charn duess vegnir vendida a grossists u exportada. Midaments èn sch’in animal sa cumporta anormal, sch’el para dad esser malsaun, sch’ils organs vesan ora curius, sch’il sajet dal chatschader ha tutgà il buttatsch u sch’in animal è vegnì tschertgà ditg cun chaun da sang.

L’ordinaziun davart la controlla da charn è vegnida fatga en connex cun la nova legislaziun da victualias grischuna. Per infurmar davart la controlla da charn è vegni organisà 30 sairas d’infurmaziun. Ils resuns dals pertutgads hajan varià tranter interess e tema. Tema che la birocrazia stenschentia il plaschair dad ir a chatscha. Finamira da la controlla da charn saja, ch’il consument sappia exact, danunder che la charn deriva, di Bearth.

Uschia vegn l' image da la chatscha optimà, cun preschentar in product che ha ina tscherta garanzia ch’el saja bun.
Autur: Giochen Bearthsubstitut dal veterinari chantunal

Sch’il veterinari decida, ch’in animal è uschè malsaun u contaminà, ch’ins na po betg duvrar la charn, lura na survegn il chatschader betg enavos l’animal.

Als custs da la controlla da charn sa participescha il chatschader cun 8 francs.

RR actualitad 08:00