Siglir tar il cuntegn
Inhalt

Chatscha 2018 Exagerar tutga tiers

Sche dus chatschaders s’entaupan na vai betg ditg ch’els discurran da la chatscha. E lura vegn raquintà istorgias incrediblas. Ma daco atgnamain?

La gruppa da chatscha Cungieri sesa vi da la maisa en tegia e fa in viva.
Legenda: Era la gruppa da chatscha Cungieri enconuscha intginas istorgias incrediblas. RTR/ Seraina Derungs

Tgi n’enconuscha betg quests raquints da chatschaders, nua ch’in chatschader ha zuppentà in animal betg lubì en in ladimer, nua ch’in tschierv è ì sper in chatschader ora, senza che lez ha vesì el, u nua ch’in chatschader ha zuppentà in animal betg lubì en in animal pli grond?

Far pli interessant l’istorgia

Istorgias da chatschaders ston bunamain esser exageradas, per far ellas pli interessantas, di Pieder Hendry. E pli savens ch’ins raquinta ellas, pli fitg ch’ellas sa midan puspè, manegia Andrea Cavegn Beer. E tuttina saja quai adina interessant e divertent d’udir questas istorgias.

Gea, quai è schon uschia, che cura ch’i vegn raquintà, sche tuttenina vegn mess vidlonder pli e pli bler ed il davos èsi halt in'istorgia extrema.
Autur: Gabriel Monngruppa da chatscha Cungieri

Dentant las propi bunas istorgias na vegnan betg raquintadas a tuts, per proteger ils pertutgads, manegia Gabriel Monn. Uschia vegn era raquintà mo a l’ur d’in chatschader che aveva pers ses giat. Il chatschader collega ha vesì in giat lunsch davent dal vitg ed ha sajettà quel. La saira ha il collega cuschinà il giat, e la fin finala ha il chatschader, che aveva pers ses giat, mangià ses agen giat.