Siglir tar il cuntegn
Inhalt

Chatscha 2018 Gabriel Monn, il chatschader cun experientscha speziala

25 onns è Gabriel Monn stà guardiachatscha. Dapi sis onns va el puspè sez a chatscha, cun la gruppa Cungieri. Da sias experientschas na profitescha betg mo il rest da la gruppa, mabain era el.

Gabriel Monn va a catscha.
Legenda: Gabriel Monn a la via tar il post. RTR/ Seraina Derungs

Gabriel Monn viva per la chatscha. Gia avant 37 onns era el cun ses bab ed in collega dal bab en ina gruppa, quai era bel. La chatscha da lez temp e dad oz saja dentant schon sa midada. Pli baud eri lubì da sajettar dus bucs-chamutsch, avant la chaura. Uschia era quai pli simpel da pudair sajettar chamutschs.

Bab da la gruppa Cungieri

En la gruppa da chatscha Cungieri saja el in zic sc’in bab, manegia Gabriel Monn. El stoppia guardar ch’il rest da la gruppa vegnia or da letg e prendia serius la chatscha.

Sbagls capitan

Grazia a l’experientscha sco guardiachatscha po Gabriel Monn distinguer pli spert, sch’igl è in animal lubì, u betg. Dentant, sbagls pon adina capitar. Per tut ils sbagls n’ha el dentant betg chapientscha, e lura poi capitar, ch’il chatschader, ch’è uschiglio plitost ruassaivel, daventa emoziunal.

RR actualitad 07:00