Siglir tar il cuntegn
Inhalt

Chatscha 2018 La chatscha 2018 è stada mediocra

Tenor Adrian Arquint, manader da l'Uffizi chantunal da chatscha saja la chatscha da chamutschs bain stada buna. Quella da chavriels persuenter fitg flaivla.

Legende: Video Emprima bilantscha da la chatscha 2018 abspielen. Laufzeit 02:28 Minuten.
Or da Telesguard dals 03.10.2018.

L'emprima bilantscha suenter la fin da la chatscha è mediocra. Tenor Adrian Arquint, manader da l'Uffizi chantunal da chatscha haja cunzunt l'aura fatg in stritg tras il quint a chatschadras e chatschaders grischuns. Al cumenzament hai dà plievgia e brentina, suenter èsi stà fitg chaud per l'atun. Entras quella chalira hai dà pauc moviment tar ils tschiervs, uschia che la chatscha è stada pli flaivla ch'ils dus onns passads. Anc pli flaivla saja la chatscha da chavriels stada quest onn. Meglier saja la chatscha da chamutschs stada.

Sch'i dovria ina chatscha speziala na saja uss anc betg cler, uschia Arquint. Qua saja da spetgar giu las cifras. Cunquai ch'il dumber da tschiervs era fitg auts tar la dumbraziun èsi fitg probabel ch'i dovra tar ils tschiervs ina chatscha speziala.

Meglras relaziuns en las valladas dal sid

En la Val Müstair sco er en il Puschlav han chatschaders pudì far ina buna chatscha da tschiervs. Cunzunt al cumenzament han questas regiuns pudì profitar da meglra aura. En il Grischun Central percunter saja la chatscha cumpareglià cun auters onns plitost sut la media. Sumegliant vesa quai er or en il rest dal chantun tar la chatscha da tschiervs e chavriels.

En tut las regiuns èsi dentant stà ina buna chatscha da chamutschs. Là han ils chatschaders e las chatschadras pudì profitar da la bun'aura.

RR actualitad 12:00