Dapi dus onns èsi lubì en il Grischun da duvrar las cameras termicas per observar ils animals. Betg lubidas èn dentant las cameras termicas per montar vid il perspectiv da la buis. Era tar ils meds betg lubids tutgan las traplas da foto, quai dentant mo durant il temp da chatscha. Ordaifer il temp da chatscha datti nagin scumond tras l’ordinaziun da chatscha, ma i vala da resguardar la protecziun da datas, tut tenor nua che las cameras vegnan plazzadas.
Blers dovran las traplas da foto a chasa. Ina part era sco med d’agid per la chatscha, per guardar nua che la selvaschina va tras.
Uffizi da chatscha na vesa nagins problems
Schebain che betg tut ils meds d’agid tecnics èn lubids durant la chatscha, na datti betg gronds problems. Tenor il manader da l’uffizi da chatscha, Adrian Arquint, datti mintg’onn sulet singuls cas nua ch’els ston chastiar chatschaduras ni chatschadurs. Quests vegnian per regla chastiads da la procura publica cun chastis dad in pèr tschient francs. L’onn passà haja per exempel dà sulet 11 chastis, tuts pervia da duvrar la trapla da fotografia durant chatscha.
Sch’ins conguala quai cun il dumber da persunas che va a chatscha, è quai fitg pauc. Ma jau sun era conscient, ch’ins na po betg controllar tut.