Siglir tar il cuntegn

Header

cuntegn

Co e cum Retrair la patenta da chatscha è uss pussaivel

Ils chatschaders e las chatschadras sa preparan sin la stagiun da chatscha che cumenza ils 3 da settember. Per inqual il pli bel temp da l'onn. Tgi che vul ir a chatscha en il Grischun dovra ina patenta. Ma nua pon ins retrair quella e tge èsi da resguardar?

Las armas da chatscha vegnan schubregiadas e reguladas. Equipads cun il perspectiv passentan chatschaders e chatschadras mintga minuta libra en il territori da chatscha. Passiunadamain vegni spievlà ed observà la selvaschina e sias disas. Avant ch'i va dentant liber cun la chatscha, ston ins ir per la patenta.

Plirs documents da preschantar

L’emprima premissa per dastgar ir a chatscha en il Grischun è d’avair passà cun success l’examen da chatscha. Il Grischun n’accepta betg examens dad auters chantuns u auters pajais. Plinavant ston ils chatschaders preschentar plirs documents per pudair retrair la patenta da chatscha. Quai èn:

  • document d’identitat,
  • il cudeschet per las patentas da chatscha
  • il mussament davart l'assicuranza da responsabladad (Haftpflichtversicherung)

Plinavant dovra mintga chatschader e mintga chatschadra il formular suttascrit persunalmein. Cun quest formular conferma el u ella per exempel che l’arma da chatscha saja vegnida regulada persunalmain e ch’ins ha ademplì l’obligaziun da tir da chatscha. Il formular sa chatta sin la pagina da l'Uffizi da chatscha e pestga dal Grischun.

audio
Retrair la patenta da chatscha è uss pussaivel
ord Co e cum dals 17.08.2021. Maletg: Keystone
laschar ir. Durada: 3 minutas 31 Secundas.

Cura e nua pon las patentas da chatscha vegnir retratgas?

Las patentas da chatscha auta, chatscha bassa e chatscha da tgira sin capricorns san vegnir retratgs a partir da mardi ils 17 d'avust 2021 en differents lieus.

A Cuira en il Museum da la natira, quai da mardi fin sonda, da las 10:00 fin las 17:00. En ils districts da chatscha pon las patentas vegnidas retratgas davenda mardi ils 17 d'avust tar ils guardiaselvaschina. En mintga district da chatscha datti dus fin quatter lieus nua che las patentas pon vegnir retratgas. Per exempel en chasa da scola u chasa communala.

Sper retrair las patentas pon ins per part era laschar controllar las armas. Las localitads exactas par mintga district da chatscha sa chattan sin la pagina d’internet da l'Uffizi da chatscha e pestga dal Grischun.

Custs

Las taxas per la patenta da chatscha en restadas tuttina sco l’onn passà. Per exempel custa ella per persunas svizras ed estras cun domicil en il chantun 760 francs per la chatscha auta e 285 francs per la chatscha bassa. Latiers vegn ina taxa da 20 francs.

RTR actualitad 11:00

Artitgels legids il pli savens