Avair uschè blers clics sco pussaivel sin plattafurmas sco Tiktok, YouTube, Facebook u Instagram è la finamira. Per survegnir quels clics vegnan magari era duvrads meds illoials. Videos da salvaments dad animals vegnan inscenads ed ils animals turmentads sapientivamain per pudair filmar e publitgar sin las medias socialas. Cun reclama che vegn mussada avant il video vegn alura gudagnà raps.
Las uniuns per la protecziun d'animals crititgeschan che las plattafurmas fetschian memia pauc encunter tals cuntegns. Las plattafurmas renvieschan a lur directivas, tenor lezzas saja scumandà da publitgar videos nua che umans u animals vegnian surduvrads. Utilisaders ed utilisadras pon annunziar a la plattafurma sch'els vesan in tal video.
Indizis per films inscenads
Sco emprim duess ins adina sa dumandar, sch'ins prendess era il telefonin e filmass la situaziun. Daco na gida la persuna che filmescha betg da spendrar l'animal? Pertge as prendan ils pretendids «spendraders» uschè bler temp per filmar tut, ed alura era anc or da differentas perspectivas? Videos ch'en inscenads chalan per regla suenter che l'animal e vegnì spendrà, videos dad organisaziuns per la protecziun dad animals mussan per regla er anc co ch'i va suenter a l'animal. Mintgatant vegnan animals surduvrads pliras giadas per inscenar in video, sch'in animal as vegn avant enconuschent è quai in indizi cler. En mintga cas duess ins annunziar ils videos suspects direct a las plattafurmas.