Siglir tar il cuntegn

Header

audio
Corona po periclitar il sistem britannic – In privel en il GR?
Or da Actualitad dals 06.01.2022.
laschar ir. Durada: 3 minutas 42 Secundas.
cuntegn

Collaps dal sistem Interpresas han in plan tar mancanza da persunal

La Gronda Britannia cumbatta cunter in collaps dal sistem. Regals vids en stizuns, trens che crodan or u er il manaschi da scola che ballucca. En il Grischun è la situaziun anc main tendida.

Traffic public

Il traffic public en il Grischun n'è actualmain betg periclità pervia dals blers cas d'omicron. Quai mussan retschertgas dad RTR. La Viafier retica sco er l'Auto da Posta SA, han ditg ch'i saja actualmain pussaivel d'ademplir tut las incumbensas. Pia tut ils trens e bus pon il mument cursar tenor urari sin ils tschancuns en Grischun.

video
Interpresas sa preparan sin ina mancanza da persunal
Or da Telesguard dals 06.01.2022.
laschar ir. Durada: 3 minutas 32 Secundas.

Omadus purschiders dal traffic public averteschan dentant che la dinamica è gronda e che l'unda d'omicron pudess avair consequenzas per l'urari. Quai munta concret: En il mender cas stuessi vegnir stritgà trens u bus sin tscherts tschancuns e durant tschertas uras, pervi da la mancanza da persunal. L'Auto da Posta SA avess dentant per exempel la pussaivladad d'engaschar persunas pensiunadas per sa gidar en cas urgents.

Provediment d’electricitad 

Nagins quitads n’èsi actualmain er da far per il provediment d’electricitad. Ozendi funcziunia la producziun per gronda part a moda digitala, tenor Thomas Grond da la Repower SA. El di perfin: «En Grischun èsi pli probabel che l’electricitad croda ora pervia d’ina lavina che pervia d’omicron».

Scolas ed ospitals 

In zic autra è la situaziun en scolas ed ospitals, quai tut tenor lieu. En la pli gronda scola professiunala en il Grischun, la GBC a Cuira, n’hai anc betg dà blers cas. Perquai ha l’instrucziun per il mument lieu a moda normala. Il directur, Ueli Florin quinta dentant ch’il dumber giaja ad aut il proxim temp. Perquai sajan els er pronts da midar sin instrucziun a distanza.

Er en il Center da sandà da l’Engiadina Bassa a Scuol, cun 450 collavuraturas e collavuraturs, funcziuna actualmain tut tenor plan. Ma davos las culissas vegn fatg ponderaziuns per reagir en cas da mancanza da persunal, ha ditg il directur Joachim Koppenberg envers RTR. Els hajan per exempel la lubientscha speziala da laschar lavurar persunas ch’èn testadas positivas, che n’han dentant nagins simptoms. Quai dentant mo en cas urgents.

RTR actualitad 17:00

Artitgels legids il pli savens