Cuira vul sa posiziunar sco spazi urban e center municipal che porscha blera qualitad da viver. Quai resorta dal concept dal svilup da la citad 2050. Quel furma la basa per la revisiun da l'urden fundamental cun la lescha da bajegiar. La stad passada è il concept stà publitgà. En tut han prest 120 persunas u organisaziuns dà lur parairi. Sin fundament da quels vul il cussegl da la citad tranter auter priorisar la segirtad dal traffic ed examinar mesiras per la protecziun da canera.
Da la structura da la citad, sur mobilitad, fin tar abitar, lavurar e temp liber
Il concept da svilup mussa per differentas spartas tant il potenzial e schanzas sco er ils ristgs da svilup. Ils dus centers cun Cuira vest e la citad veglia sco er ils singuls quartiers duain vegnir rinforzads en lur svilup. Las parts Maladers e Haldenstein duain vegnir integradas precautamain e pass per pass. En la sparta mobilitad prevesa il concept per exempel da dar paisa al svilup traffic public e traffic plaun cun il focus sin las spartas abitar, lavurar e temp liber. Là giaja sur tut era per garantir spazis da lavurar a lunga vista, per crear bunas cundiziuns per fatschentas.
