Las cifras mussan cleramain: Durant il temp da corona pateschan dapli uffants e giuvenils vi da problems psichics. Schizunt giuvenils tranter 15 e 25 onns. La psichiatria per uffants e giuvenils dal Grischun discurra, ch’els han gì l’onn passà passa 20% dapli giuvenils che han fatg diever da lur purschida.
Tschertga da respostas e motivs
Per mirar co ils giuvenils as sentan propi, ha RTR fatg in pitschen experiment, quai casualmain cun ina classa dal 10avel onn da scola a Glion. A maun d’in curt questiunari han las 10 scolaras e scolars empruvà da circumscriver lur situaziun durant il temp da pandemia. Las dumondas, che pertutgan surtut il bainstar persunal, han las scolaras e scolars en la vegliadetgna da 16 onns dastgà respunder cun Gea u Na.
Jau mezza n’hai betg depressiuns. Jau sent però, ch’i na va propi bain cun in ni l’auter da mes amis. Quels vegnan lura tar mai cun lur problems.
Betg dapli, mabain pli ferms problems psichics
Malgrà temp da pandemia sa sentan ils giuvenils dal 10avel on da scola bain – sco i resulta or da noss pitschen questiunari. Ed era tenor il mainascola, Marchet Notegen n’èn ils problems psichics betg s’augmentads en lur scola. Però quai che el senta è, che scolaras e scolars che avevan gia avant la pandemia problems psichics han uss problems pli ferms. Pervi da quai vuless il mainascola stgaffir in post da cussegliaziun.
Jau na vuless propi betg pretender che ils problems psichics en s’augmentads en nossa scola. Forsa che tar tscherts scolars ha la pandemia dentant rinforzà quels problems.
La scola chantunala ha gia in tal post
Experientschas cun in tal post da cussegliaziun ha la scola chantunala a Cuira gia dapi 20 onns. Trais magistras e magisters tgiran en in pensum parzial il post da cussegliaziun «care team». Quest post valia sco emprim pass per ils giuvenils – qua vegn guardà, tge che stat a cor als giuvenils. Terapia na vegn qua betg fatga, mabain maximalmain trais discurs da cussegliaziun. Lura vegn guardà cun il giuvenil ensemen, sch’ina terapia fiss necessaria u betg. Il «care team» da la scola chantunala lavura stretg ensemen cun la psichiatria per uffants e giuvenils dal Grischun.
Era la scola chantunala a Cuira na registrescha nagin augment dals problems psichics tar lur scolaras e scolars. Dentant era qua datti en egl, che quels giuvenils ch’avevan gia avant la pandemia problems psichics han uss problems psichics pli ferms.
Totalmain avain nus radund 1’100 scolaras e scolars. Mintg’on fan pli u main 50 giuvenils diever da questa purschida.