Crossgolf - Ussa pon ins dar golf «selvadi» sin il Brambrüesch
Per dar crossgolf na dovran ins betg bler: ina balla, in bastun da golf e buna luna. Dapi dacurt pon ins far sias emprimas experientschas cun questa furma da golf sin las 9 pistas da crossgolf sin la muntogna da chasa da Cuira – sin il Brambrüesch.
Enturn 30 persunas èn s’annunziadas il venderdi suentermezdi per l’event da crossgolf sin il Brambrüesch. Bleras da las persunas n’han anc mai gì in bastun da golf enta maun. Quai na saja dentant era betg necessari manegia Reto Götz – in dals suprastants da la «Cuminanza d’interess Brambrüesch» ch’han inizià il project.
Crossgolf sa mintgin dar. I na dovra betg ina permissiun per la plazza da golf. I na dat nagins dresscodes. Qua pon ins simplamain empruvar ora e dar ina runda.
1 / 8
Legenda:
Bleras persunas ch'han anc mai gì in bastun da golf enta maun, èn s'annunziadas per l'event.
RTR, Lukas Quinter
2 / 8
Legenda:
Quest sajet vesa ora bain.
RTR, Lukas Quinter
3 / 8
Legenda:
Las tavlas mussan quant difficil che la pista è. In «par 4» munta ch'in bun giugader tutga la figura da lain cun 4 sajets.
RTR, Lukas Quinter
4 / 8
Legenda:
Il luf – La figura da lain ch'i è da tutgar tar l'emprima pista.
RTR, Lukas Quinter
5 / 8
Legenda:
La mussadra dat in'introducziun co igl è da sajettar la balla da crossgolf.
RTR, Lukas Quinter
6 / 8
Legenda:
Tutgar la figura pitschna drova blera concentraziun.
RTR, Lukas Quinter
7 / 8
Legenda:
Concentraziun totala.
RTR, Lukas Quinter
8 / 8
Legenda:
Dus dals inizinats: Reto Götz è Martina Domenig da la Cuminanza d'interess Brambrüesch.
RTR, Lukas Quinter
Cuntrari a las plazzas da golf normalas vegn crossgolf giugà sin pastgiras. Plinavant n’èsi betg da tutgar ina rusna pitschna – mabain ina figura da lain che sa chatta mintgamai a l’ur da las pistas ch’èn medemamain pli curtas. Dal reminent paisa ina balla da crossgolf circa quatter giadas pli pauc ch’ina normala balla da golf.
La plazza da crossgolf è averta stagiunalmain – tranter mez fanadur e fin d’october tut tenor las cundiziuns da l'aura. La «Cuminanza d’interess Brambrüesch» vul stgaffir cun questa plazza in’ulteriura purschida per l’entira famiglia, ed uschia auzar l’attractivitad da la muntogna.
