In credit da Covid da 220'000 francs aveva l'um survegnì avant dus onns. Da quel ha el duvrà 70'000 francs per cumprar in'abitaziun e fundar ina nova firma. La procura publica ha pretendì avant dretgira 12 mais praschun cundiziunà per il propretari da trais pizzerias. El haja cugliunà intenziunadamain e gì en il senn da duvrar ils daners per diever privat.
Pajà enavos daners
L'inculpà e ses defensur han fatg valair ch'el n'haja mai vulì cugliunar. La finala haja el pli tard er pajà enavos ils 70'000 francs sin ses conto da fatschenta. La dretgira ha cartì al proprietari ch'el n'haja betg cugliunà a moda intenziunada. Tuttina ha la dretgira sentenziunà l'um ad in chasti da 5'000 francs, perquai ch'el haja per curt temp duvrà ina part dals daners per in auter intent. La sentenzia n'ha anc betg vigur legala.
I sa tracta dal segund cas da cugliunaria da credits da Covid che vegn tractà ad ina dretgira grischuna. L’emna passada ha la dretgira regiunala dal Plaun tractà l’emprim cas.