En tschintg onns èsi uschè lunsch: La festa federala da tir ha lieu il 2026 a Cuira. Spetgà vegnan 40'000 tiraduras e tiradurs e 100'000 aspectaturas ed aspectaturs. Il center dal la festa è a Cuira, dentant èn era enturn 25 vischnancas vischinantas involvadas:
Las disciplinas èn, sajettar cun pistola e schlupet sin distanzas da 10, 25, 50 e 300 meters. La festa federala da tir ha in budget da 14 milluns francs.
Per la quarta giada a Cuira
La festa federala da tir ha il 2026 lieu per la quarta giada a Cuira. L'emprima giada era quai l'onn 1842, lura il 1949 e la davosa giada il 1985. En l'entira Svizra è il 2026 la 59avla festa da tir federala.
La festa ha lieu durant quatter fin d'emnas durant la stad, quai èn en tut radund 30 dis nua che vegn sajettà.
Dependent da 1'500 gidantras e gidanters
Per pudair realisar la festa da tir a Cuira èn ils organisaturs dependents da var 1'500 gidantras e gidanters. Tenor ils organisaturs hajan las bleras uniuns da tir grischunas gia dà tiers da sa gidar.
En in proxim pass tschertgan ils organisaturs il discurs cun las vischnancas vischinantas e pussaivels sponsurs.