La chasa editura «Desertina» va concurs. Quai è da leger en il fegl uffizial dal chantun. L’interpresa ha ina lunga istorgia ed è stretgamain colliada cun la stampa e las medias grischunas.
Il 1997 è ella vegnida incorporada en la «Casanova Druck und Verlag». La chasa editura «Desertina» era avant ina part da l’interpresa Condrau a Mustér, ch’ha edì durant decennis la «Gasetta Romontscha». Suenter la vendita a la Casanova Druck ha la «Desertina» pers cuntinuadamain incumbensas, per exempel l’ediziun dal fegl uffizial chantunal e ulteriuras incumbensas chantunalas.