El veglia sustegnair Roman Hug e cussegliar el, di Heinz Brand da la PPS a chaschun d'ina occurrenza da cumbat electoral a Fläsch. Ses pli impurtant cussegl: «Ir ora tar las persunas e betg pensar che quai tanschia da far inserats, i dovra il contact». El sez haja tar sia segunda candidatura manchentà quai in zic, perquai ch'el saja lura stà dapli a Berna ch'en Grischun.
Dentant quai che pertutga inserats n'era Heinz Brand er betg il pli modest: Nus ans regurdain anc da ses auto, in mini cun da mintga vart ses conterfei. Survegn Roman Hug er uschia insatge?
Mintga candidat sto avair insatge che stat per ses cumbat. Sch’in auto è anc modern na sai jau betg, dentant tge che nus faschain tuttina è, da reparter las turtinas da nuschs da Sedrun
Hug percunter metta ils ultims dis pli fitg sin social media, ha installà differents accounts e pavla quels regularmain. Er Heinz Brand posseda instagram, «dentant jau na sun betg in ami da questas medias digitalas», conceda el. Quai fan lura auters ord il team da cumbat electoral. Heinz Brand vul plitost a moda e maniera analoga far pli enconuschent il candidat da la partida populara. Quai veglia el era far cun appellar a la basa. «La PPS è uss autra che cur che jau hai candidà. Nus avain uss bleras secziuns e pudain activar quellas per far enconuschent noss candidat».