Siglir tar il cuntegn

Header

cuntegn

Cun cundiziuns Persunal d'alp po far meztga d'urgenza

A partir da questa stad po er il persunal d'alp far meztga d'urgenza, per exempel suenter ch'in animal è sa blessà ad alp suenter ina crudada u ina stgarpada tras in luf. Quai scriva l'uffizi per la sanadad d'animals en lur rapport annual.

Sch'in animal sa fa mal sin in'alp, va normalmain in veterinari u ina veterinaria per il cas d'urgenza sin l'alp. Quai era per pudair far sche necessari meztga d'urgenza. Sche las alps n'èn betg bain accessiblas, sto la Rega sgular. Per il cas ch'igl è mal'aura e la Rega na po dentant betg sgular, pon ussa er pasturas e pasturs mazzar ils animals.

Tenor l'uffizi per sanadad d'animals haja adina puspè dà malsegirezzas pertutgant la pratica en quest connex, sco lez ha ditg sin dumonda dal schurnal regiunal da SRF. Per pudair far quai, sto il persunal d'alp dentant far avant ch'ir si d'alp in curs tar in veterinari u ina veterinaria ed avair ina pistola speziala. Sch'i dess ina situaziun nua ch'i fiss da far meztga d'urgenza, ston ils pasturs e las pasturas dentant tuttina sco emprim infurmar il veterinari u la veterinaria. Lura decidan lezs sch'els pon sez far il viadi u betg.

audio
Per tadlar: curt e cumpact
aus RTR Audio vom 07.05.2022.
abspielen. Laufzeit 1 minuta 19 Sekunden.

RTR novitads 06:00

Artitgels legids il pli savens

Scrollar a sanestra Scrollar a dretga