Tar in Gea a l'iniziativa vegnissan reclamas da tubac scumandadas dapertut, nua ch'ellas cuntanschan uffants e giuvenils. Plinavant stuessan Confederaziun e chantuns s'obligar da promover la sanadad dals giuvens. Co quai duai vegnir realisà n'ha l'iniziativa betg definì.
«L'iniziativa va memia lunsch»
Al Cussegl federal sco er al parlament va l'iniziativa memia lunsch. Els sustegnan da principi l'idea da proteger meglier uffants e giuvenils, ha ditg il Cusseglier federal Alain Berset la gievgia a Berna avant las medias.
Reclama en gasettas, en l'internet sco er tar kiosks duai dentant vinavant esser lubida, uschè ditg che quella na sa drizza betg explizit envers uffants. Il Cussegl federal argumentescha cun la libertad economica. Plinavant tutgia il scumond da sponsoring, che fa era part da l'inziativa, differents eveniments da cultura e sport.
Limita da vegliadetgna 18
Il Cusseglier federal ha plinavant fatg attent sin la cuntraproposta indirecta, ch'il parlament ha decis durant la sessiun d'atun. Quella po entrar independent da la votaziun il favrer en vigur. Entras la cuntraproposta vegn reclama da tubac scumandada en kinos e tar placats. Il sponsoring è scumandà tar occurrenzas cun caracter internaziunal u sche occurrenzas sa drizzan explizit ad in publicum minoren.
Ils chantuns pon decider reglas pli strentgas. Plinavant porta la revisiun da la lescha in scumond da vendita per giuvenils sut 18 onns. Fin uss e quest cunfin en singuls chantuns tar 16 onns.
La populaziun decida ils 13 da favrer areguard l'iniziativa.