Dapli agid per cas da direzza – e bunas cifras dal turissem
Tranter auter ha il president da la regenza e minister d'economia Marcus Caduff infurmà dal program per cas da direzza. I dettia circa 15% dals cas da direzza ch'i tutgia propi dir ed èn a la limita – pia gia sin il maximum da la contribuziun federala. Là ha il chantun decidì da gidar, sche la cumissiun da gestiun dat liber in credit correspundent da 6 fin 7 milliuns francs. En il sectur dal turissem ha Caduff però pudì far bilantscha positiva: Las cifras sajan pli autas che la media dals davos tschintg onns.
L'occupaziun da letgs intensivs tschessa
Il minister da sanadad Peter Peyer ha infurmà ch'il dumber dals letgs intensivs occupads giaja enavos, malgrà las cifras autas d'infecziun. Davart schluccar mesiras n'ha Peyer ditg nagut concret, mo ch'el quintia ch'il Cussegl federal annunzia schluccadas.
Ins vul ch'era scolastas e scolasts pon stritgar la mascrina
Il minister d'educaziun Jon Domenic Parolini n'ha er betg vulì vegnir pli concret puncto mesiras federalas. Tenor el decida il Cussegl federal, schebain era las persunas d'instrucziun dastgan bainbaud lavurar senza mascrina.
Mesiras custan pli pauc che temì e spetgà
Puncto custs per las mesiras da corona ha il minister da finanzas Christian Rathgeb declerà, che quests sajan pli bass che budgetà. Ins haja per exempel quintà cun dapli sperditas ord las taglias ed er ils custs supplementars ch'il chantun haja gì sajan stads pli bass. Uschia quinta Rathgeb ch'il quint 2021 vegnia malgrà tut a serrar pli positiv che calculà.
