Tenor il protocol da la cumissiun da gestiun hajan il biro d'architectura tessinais ed ils planisader sincerà anc l’avrigl da questa primavaira d'avair sut controlla ils custs. Il quint dals 7 da matg da l’impressari haja lura mussà il cuntrari. Custs supplementars da 500'000 francs. Quai per lavurs che na sajan mai vegnidas tematisadas vers il patrun da construcziun e che sajan vegnidas dadas libras dals architects e planisaders.
Spezialamain lavurs vi da la chanalisaziun e mirs da betun han purtà custs supplementars. Il punct da partenza dal bajetg dals onns 70 avessan ils architects gì d'enconuscher ed uschia da resguardar en la fasa da budget. Il mument è il chantun vidlonder da sclerir cun in giurist il cas e perquai na piglia l'Uffizi da construcziun auta er nagina posiziun.
Morder en il mail amar
Ils prest 20 onns che Markus Dünner è manader da l'Uffizi da construcziun auta n’ha el anc mai gì da far ina dumonda per in credit supplementar al Cussegl grond. Il credit supplementar per il bajetg Sinergia è stà necessari perquai che la citad da Cuira ha pretendì parcadis sutterans. Il credit da 700'000 francs per la basa da polizia a San Bernardino fa ch'il bajetg vegn a custar la fin finala 8 milliuns francs.
Retard
Planisà era che la Polizia chantunala po retrair la stad 2021 suenter in onn construcziun la basa renovada. Per divers motivs vegn il bajetg ad esser pront la fin da quest onn.