La suprastanza da Schiers propona a la radunanza communala d'extrar dal consorzi da scola, che cumpiglia era Fideris, Furna e Jenaz e ch'exista dapi il 2013. Ils custs disturban ils da Schiers, sco las gasettas da Somedia scrivan. Sin basa da la clav da repartiziun paja Schiers circa 60% dals custs totals da 6,98 milliuns francs per l'onn 2021/22. La vischnanca suppona era che manar sezza la scolina e la scola primara custass pli pauc.
La suprastanza da Schiers crititgescha vinavant che la repartiziun dals sezs en il cussegl da scola na correspundia betg a la repartiziun dals custs. Els han dus dals tschintg sezs en il cussegl dal consorzi. In ulteriur punct saja era la chasa da scola per il stgalim superiur ch'è a Schiers. Il consorzi ha prendì en locaziun quel, ils custs accessorics ch'èn inclus en il tschains-chasa na tanschian dentant betg per ils custs effectivs da la vischnanca.
Avant dus onns hai dà emprovas da schliar ils nufs tar il consorzi da scola dal Partenz Central – adumbatten. Mez matg vul la suprastanza da Schiers laschar vuschar sche la vischnanca duai bandunar il consorzi.