«Respect» saja in pled ch'ins inscuntria savens er en connex cun la pandemia actuala, argumentescha la giuria l'elecziun dal pled rumantsch da l'onn 2021. I giaja per respectar opiniuns dad autras persunas, lur quitads e lur ponderaziuns.
Questa tscherna dal pled rumantsch da l’onn 2021 po era vegnir interpretada sco giavisch per dapli respect sco impurtanta resursa umana en in temp cumplitgà.
Sco «respect» stattan er ils pleds rumantschs sin posiziun dus e trais, «pazienza» e «tgira» sut l'ensaina da la pandemia. Uschia dovria vinavant pazienza e perseveranza per surmuntar la crisa da corona. Er pazientas e pazients dovrian blera pazienza. Il pled «tgira» sin il terz plaz saja vegnì elegì sco term general ch'haja fatschentà il 2021. Uschia fetschia quel l'allusiun a l'iniziativa da tgira, als quitads che corona chaschuna en ospitals, ed a la politica da sanadad en general.
Er en las autras regiuns linguisticas ha la pandemia laschà fastizs, dentant cun excepziuns. Uschia è il pled da l'onn franzos «iel». I sa tracta d'ina nova creaziun d'in pronom, ina cumbinaziun da «il» ed «elle». Quella nova creaziun na stettia betg mo per la debatta davart transidentitad, mabain er per la debatta tgi ch'haja la pussanza da la lingua. Il pled talian da l'onn è «certificato» – tgi che discurra il 2021 da certificats discurra senza dubi dal certificat da Covid-19, uschia l'argumentaziun da la giuria tessinaisa. Il pled da l'onn tudestg «Impfdurchbruch» mussa la speranza che saja ida a perder durant l'onn. L'entschatta haja la societad anc fidà che la normalitad turnia puspè suenter la vaccinaziun. Uss sa mussia però ch'il virus rumpia adina puspè atras.
| Onn | Rumantsch | Tudestg | Talian | Franzos |
| 2021 | respect | Impfdurchbruch | certificato | iel |
| 2020 | mascrina | systemrelevant | pandemia | coronagraben |
| 2019 | luf | Klimajugend | onda verde | vague verte |
Igl è stà il terz onn che las quatter regiuns linguisticas han elegì il pled da l'onn tenor ils medems criteris.
