A bleras ustarias vai tuttina. Ellas eran reservadas u perfin cudeschadas ora per tut las fin d'emnas davent da la fin november enfin l'entschatta schaner. Uss han per part dapli che la mesadad da las fatschentas puspè annullà las tschainas.
Las annullaziuns han prendì tiers fitg pervia da la situaziun da corona. I na fa nagin plaschair pli da prender giu il telefon.
In zichel pli plaschaivel vesi tranter auter ora tar il Hotel Stern, l'ustaria La Vita ed il Zunfthaus zur Rebleuten a Cuira. Els n'hajan enfin uss betg bleras annullaziuns.
Betg mo ina sperdita finanziala
Sch'i vegni tuttina stritgà la tschaina da Nadal na saja quai betg mo ina sperdita finanziala, mabain era ina sperdita da mangiativas. Ins haja bleras giadas gia cumprà tut per preparar las spaisas, di Blerim Kastrati da l'ustaria La Vita.
Tschaina da Tschaiver empè da Nadal
Dentant, ils blers giasts che vegnan cun las famiglias u collegs prendian davent in zichel il squitsch finanzial e plinavant saja il november era stà fitg ferms, dian differentas ustarias. Ils ustiers e las manadras da hotels speran che las fatschentas prendian alura tiers suenter las tschainas da Nadal e fetschian ordlonder ina tschaina da tschaiver il schaner, favrer u mars.