Dataland - Er l'archiv dad RTR è in «dataland»

En ils archivs da la SRG SSR datti per exempel var 2 milliuns uras material d’audio e video. Tut quai material è era descrit – ha pia infurmaziuns sco num d’emissiun, temp d’emissiun, cuntegn, protagonists lieus ed anc bler – pia milliuns e milliuns datas.

Ed era l’intelligenza artifiziala gioga adina ina pli gronda rolla en ils archivs. Tschertas unitads da la SRG SSR lavuran gia en tschertas spartas cun quella intelligenza. RTR è vi dad elavurar in project persuenter. Concret pudess l'intelligenza artifiziala per exempel levgiar la lavur a l'archivar – vul dir che programs/applicaziuns taidlan contribuziuns e scrivan quai ch'els audan en in text e san schizunt nudar chavazzins dal cuntegn en l’archiv.

In'autra varianta pudess gidar a meglierar las infurmaziuns ch'èn oz gia en l’archiv. Concret pudess ins laschar tadlar in program che sa rumantsch las contribuziuns da radio e televisiun ch’èn gia en l’archiv – laschar cumparegliar el quai ch'el auda cun quai ch'è gia nudà en l'archiv e cumplettar las infurmaziuns, sch'i dat dapli e meglieras che quellas ch’èn gia nudadas dals archivars e las archivaras.

Natiralmain pudessan quels programs lura era sustegnair redacturas e redacturs. Il mument na datti anc betg quella pussaivladad per RTR, il project è dentant lantschà.

RR actualitad 11:00