Siglir tar il cuntegn
cuntegn

CheeseMaster Svizra sto dumagnar signun artifizial

La SRG SSR cun RTR tschertgan tai per far chaschiel. I va per in gieu online, nua che tut las Svizras e tut ils Svizzers emprovan da dumagnar in computer (che fa era chaschiel).

A partir d'immediat vali da trenar il gieu electronic CheeseMaster sin www.cheesemaster.ch, il link avra en ina nova fanestra. I vala da pudair dumagnar il computer!

Logo dal gieu Cheesemaster: ina magnucca cun taglia ora in quart. Quai vesa ora sco c ed ina bucca che maglia las lettras "heeseMaster"
Legenda: CheeseMaster Uman u maschina, tgi gudogna? CheeseMaster

Trenescha immediat!

La saira dals 21 da november a chaschun da l’emissiun <data>land cumbatta in e scadin che s’annunzia sin www.cheesemaster.ch, il link avra en ina nova fanestra cunter in computer cun sia intelligenza artifiziala. Lez – il signun artifizial uschè da dir – producescha d’in cuntin chaschiel en sia chascharia virtuala. Ils vairs carstgauns fan il medem e chaschan, taglian, etichetteschan e tgiran magnuccas en lur atgnas fabricas da chaschiel virtualas.

Screenshot dal gieu Cheesmaster - ins vesa ina chaschiela cun in crutsch verd sper il pled "etichettar" ed il nuv "giugar". Suren ves'ins quants chaschiels vegnan producids per minuta ed il num da la chascharia (AlpNaustgelsGoingBig)
Legenda: uschia vesi ora… La AlpNaustgelsGoingBig va "big". In screenshot dal Cheesemaster. RTR

La finamira da quest experiment en furma da gieu è da producir cun l’intelligenza natirala umana dapli chaschiel che l’intelligenza artifiziala dal computer. L’experiment ha lieu ils 21 da november la saira durant l’emissiun <data>land ch’è da vesair sin tut las chadainas principalas da televisiun da la SRG SSR.

Il chaschiel dovra TAI

Per che quai gartegia po tgi che vul trenar gia ad ura: A partir da la damaun dals 16 da november pon ins chargiar giu il gieu Cheesmaster sin il telefonin e sa preparar da far magnuccas. Dumagnain nus Svizzers da batter l’intelligenza artifiziala? Schon, però mo sch’ils Grischuns sa gidan ;).

RR actualitad 07:00