A partir da l'avust vul il chantun analisar en connex cun il coronavirus las auas persas dad 80% da la populaziun grischuna. Quai sco mesira supplementara sper il testar ed il vaccinar, ha declerà il schef dal stab directiv chantunal Martin Bühler envers il schurnal regiunal da SRF. Actualmain as participeschan 12 sereneras grischunas a las analisas, l'avust duain quai lura esser 20. Cun testar l'aua persa possian ins numnadamain persequitar infecziuns da corona e lur svilup en in’entira regiun. E quai era sche gia blers hajan survegnì il vaccin e consequentamain pli paucas persunas sa laschian u stoppian sa laschar testar.
Resultats clers
Gia avant maun èn resultats actuals da la serenera da Cuira. Ed ins haja gia vesì resultats clers. Quels mussan che la varianta delta ch'è pli contagiunsa, dominescha cleramain las ultimas emnas.
Pli bunmartga che testar
Fin la fin da l'onn custa il project al chantun in mez milliun francs. Quai è pli bunmartga che la strategia da testar e vaccinar, per la quala il chantun ha quintà, enfin la fin da l'onn 2021, 25 milliuns francs.
Grischuns e Grischunas sa participeschan bain e fan tests
Sco Yves Quirin da l'Uffizi chantunal d'ambient ha ditg envers il schurnal regiunal da SRF, sa sviluppian las datas da las persunas ch'èn testadas positiv ed ils fastitgs dal coronavirus ch'ins chattia en l'aua persa tuttina. Quai muntia ch'ils Grischuns e las Grischuns sa laschian testar regularmain ed era il mument ch'els hajan sintoms.
