La decisiun è stada clera. La maioritad dals deputads e las deputadas han ditg Na ad ina resoluziun ord las retschas da la PPS dal Cussegl grond, che vuleva ch'ils tests per giuvenils vegnian pajads.
La resoluziun è vegnida dal deputà Nicola Stocker. La raschun principala era l'obligatori da certificat en blers lieus publics. Glieud giuvna fin 25 onns na saja strusch periclitada dal coronavirus. Tuttina sajan er persunas giuvnas pertutgadas da las mesiras e vegnian entras ils tests, che custan dapi ils 11 d'october, sfurzads da sa laschar vaccinar. Questa decisiun na dastgia dentant betg vegnir prendida ord motivs finanzials. Gist glieud giuvna na sappia betg prestar da far tests per pudair prender part a la vita publica, uschia ils arguments.
Ils arguments cunter la resoluziun èn cunzunt stads, ch’ins veglia persvader uschè bleras persunas sco pussaivel da sa laschar vaccinar, pajar tests saja contraproductiv per quest intent.
Nov project da pilot
Plinavant han las vaccinaziuns dà da discutar en il Cussegl grond. Il chantun planisescha da far tests da anticorpuls en ina regiun da test. Persunas che han anticorpuls stuvessan lura laschar dar be ina giada il vaccin. Ils detagls dal pilot n'èn dentant anc betg enconuschents. Cunzunt en la gruppa da persunas tranter 40 e 60 avess il chantun gugent, sche la quota da vaccinar creschiss.
Er quai che pertutga laschar dar la terza vaccinaziun na pudeva il chantun anc betg ir en ils details. La cumissiun federala da vaccinar haja da decider sche l'uschènumnà «booster» fa senn. Sche quella avess da dar l'ok fiss il chantun svelt promt per pudair far quai: En chasas da vegls pudessan ils medis dar il vaccin, autras persunas pudessan puspè ir en centers da vaccinar ubain er tar miedis da chasa ubein en apotecas.
