Siglir tar il cuntegn

Header

cuntegn

Decisiuns da la Regenza Dus projects da vias – sustegn finanzial per sistem da survegliar

La Regenza grischuna ha approvà plirs projects che pertutgan L'Engiadin'Ota, il Puschlav e las vischnancas da Flem e Surses. La survista da las decisiuns.

Glisch verda per sanaziuns da via a Silvaplana

Il project prevesa lavurs sin ina lunghezza totala da var 280 meters. La rundella duai vegnir renovada e las vias che van en la rundella duain vegnir curregidas. Quai ha il Chantun communitgà oz. Plinavant duai dar fermadas da bus adattada a glieud cun impediments ed in passape. Il project prevesa custs da var 3,5 milliuns francs, 950'000 duai la vischnanca surpigliar.

Rundella a Silvaplana
Legenda: La rundella era oriundamain be vegnida construida sco punct dal traffic provisoric, quai avant 25 onns. MAD

La rundella collia la via d'Engiadina e la via da Malögia. Cun quai furma ella l'axa da traffic la pli impurtanta da l'Engiadina. Sper l'access principal per il turissem da l'Italia saja la colliaziun er impurtanta per il transport da rauba.

Renovaziun da la via dal Bernina a Poschiavo approvada

La Regenza ha approvà il project per renovar la via dal Bernina a Poschiavo. Il traject dal project sa chatta entaifer il vitg da Poschiavo. La cuvrida da la via è en in nausch stadi e sto vegnir renovada.

Chantun Grischun.
Legenda: MAD

La via ademplescha ultra da quai betg la largezza minimala per ina via principala. La via duai perquai vegnir schlargiada sin sis meters. Ils custs totals per il project da renovaziun èn var 880 000 francs.

Nov sistem da surveglianza per il Crap da Flem

Il nov sistem da survegliar il Crap da Flem po vegnir realisà. La regenza grischuna ha approvà quel e concedì ina contribuziun da maximalmain 60'000 francs. Il sistem da preavertiment pussibilitescha da registrar ad uras crudadas da crappa pli grondas u er pli pitschnas che pudessan periclitar Flem e Fidaz.

Crap fa Flem.
Legenda: MAD

Cun il sistem da fin qua po be vegnir registrà crudadas da crappa fitg grondas, che sa mussan gia sur blers onns. Il nov sistem consista da duas parts: ina è la valitaziun da la situaziun permanenta al lieu, l'autra ina mesiraziun vi da la paraid dal crap da Flem cun in scan da laser. Quella vegn fatga mintga 5 onns or dad in helicopter.

Center d'elavuraziun da laina a Tinizong po vegnir stgaffì

La regenza ha approvà la revisiun parziala da la planisaziun locala da la vischnanca da Surses. Quella era vegnida concludida ils 30 d'avust 2021. Cun quai èn las premissas per realisar in center d'elavuraziun da laina per la firma Uffer SA a Tinizong stgaffidas. Il center duai cumpigliar divers edifizis e gidar a garantir las resursas sco era a cumplettar la chadaina d'elavuraziun da laina.

Project center d'elavuraziun da laina Tinizong.
Legenda: MAD

RTR novitads 09:00

Artitgels legids il pli savens

Scrollar a sanestra Scrollar a dretga