Siglir tar il cuntegn

Header

cuntegn

Decisiuns da la regenza Vias separadas per viandants e bikers a Tavau

Intginas sendas da viandar e da bike dastgan uss vegnir separadas ina da l’autra a Tavau. Per quest intent ha la regenza stuì approvar formalmain la planisaziun locala.

Concret vai per ina senda che maina dal Jakobshorn via Val Sertig en la regiun dal Rinerhorn e da là en direcziun Monstein. Ils davos onns è quest traject vegnì frequentà adina pli ferm da bikers e viandants. Cunquai che la senda è per regla mo 80 centimeters lada, hai dà adina puspè conflicts. Cun separar il traject da bike dal traject da viandar duai quai vegnir evità.

La regenza ha dentant anc definì ina cundiziun: La senda existenta che passa en la zona da protecziun al «Trischtelmeder» stoppia vinavant vegnir duvrada communablamain.

Sustegn per project da protecziun

Plinavant ha la regenza decidì da sustegnair in project da protecziun cunter crudada da crappa a Tavau. Concret survegn la Viafier retica ina contribuziun da maximalmain 750'000 francs per il project da protecziun tranter la staziun da Tavau Monstein e Filisur. Il project duai vegnir realisà en duas etappas ed esser a fin l'onn 2023.

Grip
Legenda: Vid quest grip è planisà il project da protecziun da crudada da crappa. MAD

Sin il traject tranter Monstein e Filisur datti actualmain repars temporars. Quels protegian ils binaris da crudada da crappa. Ils davos onns haja la viafier dentant gì bler da far cun rumir la crappa. Plinavant na dettia nagina via fin als repars. In dals repars saja en nauscha cundiziun, uschia ch'i exista in deficit da segirezza, scriva la regenza grischuna.

 

RTR novitads 10:00

Artitgels legids il pli savens