Siglir tar il cuntegn

Header

cuntegn

Decisiuns dals 26 da settember Bleras elecziuns e votaziuns communalas

Ils 26 da settember han bleras vischnancas d'eleger lur gremis communals. I spetgan dentant era pliras votaziuns per credits. RTR porscha ina schelta da decisiuns che vegn adina puspè actualisada.

Legenda: RTR

Lantsch

Il suveran da Lantsch ha la schelta: Il president actual Simon Willi sa metta puspè a disposiziun e Peter Nadig vul daventar da nov president communal. Per la suprastanza communala candideschan 5 persunas – ina dapli che necessari: Armon Margreth, Fabian Simeon, Sheila Karrer, Mark Piccaluga e Daniel Ulber.

Tumleastga

Gist quatter persunas vulan surpigliar il timun da la vischnanca da Tumleastga. Per il presidi communal candideschan Ursula Tscharner-Bernold (58) da Veulden, Othmar Anton Caviezel (70) da Tumegl, sco era Pius Giger (49) e Samuel Wahlen (40) da Pasqual. In dad els succeda a Werner Natter che ha demissiunà suenter 13 onns.

Churwalden

Il suveran da Churwalden elegia lur represchentants communals. Per il presidi e la successiun da Margrith Raschein datti in cumbat tranter Karin Niederberger da Malix e Hans Suter da Churwalden. Per ils 6 ulteriurs sezs en suprastanza candideschan en tut 13 persunas. Dapi la fusiun dal 2010 sa cumpona la suprastanza da 6 persunas – mintgamai duas da Churwalden, da Malix e da Parpan.

Valragn

A Valragn vul Christian Simmen restar president communal e candidescha per la perioda d'uffizi 2022-24. Per la suprastanza communala candideschan 4 persunas – tantas sco sezs: Georg Trepp, Andrea Kriegbaum, Gian Zinsli ed Orlando Strub.

Trimmis

Roman Hug (PPS) candidescha per in'ulteriura perioda d'uffizi sco president communal da Trimmis, malgrà ch'el ha annunzià sia candidatura per la regenza grischuna. Per ils quatter sezs en suprastanza candideschan Christian Kindschi (PLD), Cecilia Manetsch (Allianza dal Center), Nicola Stocker (PPS) e Marcel Coray (PLD).

Ilanz/Glion

La vischnanca sto eleger ina persuna per il parlament communal. A disposiziun stattan 4 persunas: Rita Cavegn-Duff (Allianza dal Center), Roland Falk, Andrina Ragettli-Drack e Daniel Tata Schneider (tuts senza partida). Quest'elecziun è necessaria, damai che Martin Capeder è vegnì elegì il zercladur en suprastanza e parlament ed è sa decidì da surpigliar il post en suprastanza. Il parlament da Glion dumbra en tut 25 commembras e commembers.

Surses

Il suveran da Surses sto cumplettar la suprastanza communala: Per ils dus posts candideschan Irene Colb e Romeo Poltera – omadus da Savognin.

Legenda: RTR

Mustér

Suenter 13 onns vul la vischnanca da Mustér sbassar il pè da taglia per 10% (da 120 sin 110%). Quai propona il cussegl da vischnanca. La suprastanza communala e la cumissiun avevan atgnamain proponì da sbassar il pe da taglia be per 5% l'onn proxim e silsuenter analisar mintga dus onns la situaziun.

Flem

Il suveran da Flem decida davart in credit da passa 4,8 milliuns francs per sanar la via tras il vitg. I va per meglierar la segirtad da peduns sin la Via Nova – tranter il center Stenna e la posta a Flem Vitg. Plinavant duai quest traject era vegnir pli attractiv sco lieu d'inscunter. La sanaziun è planisada en tschintg etappas aifer dus onns e mez, las lavurs cumenzassan il mars 2022.

San Murezzan

San Murezzan decida davart l'avegnir da la halla da chavaltgar ch'è gia dapi otg onns serrada. Suenter che differents projects han fatg naufragi, ha la vischnanca decis il 2018 da prender a mauns la planisaziun da sanaziun ed utilisaziun. Il suveran decida areguard il credit da 1,5 milliuns francs per il project.

Domat

Domat decida davart in credit da 3 milliuns francs per sanar la halla da gimnastica Caguils e per fabritgar ina nova canorta. La halla datescha da l'onn 1980 e na correspunda betg pli a las normas da segirtad pertutgant terratrembels e donns da fieu.

Cuira

Enstagl da sanar la caserna a Cuira, duai l'entira infrastructura militara vegnir spustada sin l’areal dal Rossboden. Uschia vegn l'areal da la caserna liber per realisar là spazi da viver e da lavurar. Il suveran da Cuira decida sche la citad duai cumprar enavos ina cumpart da l'areal da la Confederaziun per 36 milliuns francs. Il parlament da la citad sustegn unanimamain il project.

Favugn

Ils da Favugn decidan ils 26 da settember davart quatter fatschentas. Tranter auter duai il contract da concessiun per la explotaziun da crappa en la construcziun sutterana en la crappera «Caneu» vegnir prolungà. En pli decida il suveran er davart la revisiun parziala da la lescha da polizia, ina nova lescha d'energia e la revisiun parziala da la lescha da pumpiers.

Grono

Grono decida areguard il project per realisar ina nova via da velos intercommunala en la Bassa Mesolcina inclusiv ils custs per il project. Quels muntan per l'entir project a 4'894'000 francs - 1'530'000 francs stuess la vischnanca da Grono surpigliar. Il project duai stgaffir ina nova lingia da colliaziun per velos, tranter auter sin l'anteriur traject da la viafier, en la regiun e sur ils cunfins chantunals.

Tavau

Tavau vul schluccar las reglas quant ditg che represchentants communals dastgan restar en uffizi. Tranter auter duain persunas ch'èn gia stadas duas periodas en suprastanza (Kleiner Landrat) dastgar surpigliar duas ulteriuras periodas sco president communal (Landamma). Ozendi è quai strusch pussaivel, damai ch'il temp d'uffizi è limità sin 12 onns.

Breil

Per la meglieraziun dal terren en il territori da Breil-vitg dovra la vischnanca in credit supplementar da 7,25 milliuns francs. Tranter auter duai la Via Alp Quader vegnir sanada cun quest credit supplementar.

RTR votaziuns 2021

Artitgels legids il pli savens

Scrollar a sanestra Scrollar a dretga