Toni Morosani è il nov president da la destinaziun turistica Tavau-Claustra. El ha survegnì 117 da las 181 vuschs valaivlas. Il hotelier da Tavau ha fatg prest dubel uschè bleras vuschs sco Valérie Favre Accola. Morosani succeda uschia a Paul Petzold che n'ha betg pli candidà per in'ulteriura perioda d'uffizi.
Morosani ha 52 onns ed ha 27 onn experientscha en l'hotellaria. Tranter auter è el stà en differentas funcziuns en l'hotellaria en ils Stadis Unids da l'America, da l'America dal Sid, Turitg e San Murezzan. Dapi 17 onns è el manager dals hotels Morosani.
16 onns Paul Petzold
La radunanza generala da quest onn è stada l'ultima da Paul Petzold. El è stà 16 onns en il cussegl d'administraziun e da quels set sco president. Sia gronda satisfacziun saja d'avair purtà ils divers exponents turistics vi d'ina maisa per discurrer d'ina via communabla da Tavau e Claustra.
