Preparà questa lecziun han el l'aventmezdi, ensemen cun studentas e students da la Scol'auta da pedagogia a Cuira. Là han els tranter auter emprend?i co survegnir l'attenziun dals scolars ubain co parter en il temp da las lecziuns. La purschida da la PHGR è sa drizzada spezificamain a buobs. Quai perquai ch'umens manchian en la professiun.
Davart la raschun pertge che quai saja uschia, di il rectur da la Scol'auta da pedagogia Gian-Paolo Curcio: «I dat blers motivs, in è dentant che blers umens giuvens han il sentiment ch'i na dettia nagina via da far carriera, ch'ins resta scolast enfin la pensiun». Vid quai na patratgan Levin, Alfons e Jaron anc betg. Els vulan daventar scolasts perquai ch'els hajan plaschair a far quai.
Um u dunna n'emporta betg
Savens aud'ins, che scolars dovrian en scola in model masculin. Dentant quai è be ina paraula: «Jau n'enconusch betg in studi che mussa qua differenzas en l'instrucziun che umens ubain dunnas fan. Nus patratgain adina en quellas rollas, dentant da quai stuain nus vegnir davent e metter il carstgaun en il focus. Quai n'è betg uschia che la dunna instruescha uschia e l'um auter».
Ils trais uffants vesan dentant schon pitschnas differenzas. Levin di per exempel: «Ils umens fan dapli dumondas e las dunnas dian tge ch'è da far e quai èsi lura da far». E Jaron agiunta: «Las dunnas èn pli strentgas».
Premiera gartegiada
Forsa che quai dat gea en insaquants onns trais novs scolast per il Grischun, perquai ch'er suenter lur premiera gartegiada èn Jaron, Alfonso e Levin persvadids, ch'els vulan en il futur daventar scolasts. Ed er lur emprima classa, ina terza classa da la chasa da scola Rheinau a Cuira ha dà bunas notas als scolasts in Spe. In buob di: «Vus daventais in di segir buns scolasts».