Mintga duas emnas mora ina persuna pervia da violenza a chasa. Radund 80% da las dunnas ch'èn stadas victimas da violenza sexuala enconuschevan il delinquent gia avant. L'onn 2020 hai dà en Svizra almain 713 violaziuns e 683 cas da sforzs sexuals. Encunter tut quai ed aunc bler han radund 25 dunnas e dus umens protestà sin la via da la posta a Cuira.
«Na è Na»
Cun bler canera, placats culs pleds «Mo in GEA è in GEA» e parolas sco «Sche ti violeschas ès ti il culpà - Mes corp s'auda a mai» èn els ids enfin la galaria da la citad. Là ha la band «What the Funk» procurà per musica.
11 minutas silenci
Ma i ha era dà in'acziun pli ruassaivla: 11 minutas da silenzi per in cas da violaziun che ha gì lieu en Svizra. Ina derschadra da Basilea aveva decidì in chasti pli miaivel pervia che la violaziun ha «mo» cuzzà 11 minutas.
Per ina da las collavuraturas da la Chasa da dunnas Grischuna è quai nunchapibel. Quai saja in pugn en fatscha per tut las dunnas che sajan u sajan stadas victimas da violenza sexuala. Ella è pertscherta ch'ins sto entschaiver tar ils pitschens per che la societad sa midi.
Nus stuain mussar als buobs e las buobas co ir enturn endretg in cun l'auter e mussar ad els co dir Na.
Violenza sexualisada na cumenza betg pir cura ch'ins vegn tutga en lieus ch'ins na vul betg. Ella entschaiva gia sch'i vegn clamà u tschivlà suenter per exempel sin via u fatg remartgas sexisticas.